शनिवार, मई 15, 2010

बालकाण्ड 1

बालकाण्ड 1
राजीव कुमार कुलश्रेष्ठ
satguru-satykikhoj.blogspot.com
tulasi das .. Ram Charit Manas..ramayan
story of the lord rama..king of ayodhya
by...rajeev kumar kulshrestha
जो सुमिरत सिधि होइ गन नायक करिबर बदन ।
करउ अनुग्रह सोइ बुद्धि रासि सुभ गुन सदन
मूक होइ बाचाल पंगु चढइ गिरिबर गहन ।
जासु कृपा सो दयाल द्रवउ सकल कलि मल दहन
नील सरोरुह स्याम तरुन अरुन बारिज नयन ।
करउ सो मम उर धाम सदा छीरसागर सयन
कुंद इंदु सम देह उमा रमन करुना अयन ।
जाहि दीन पर नेह करउ कृपा मर्दन मयन
बंदउ गुरु पद कंज कृपा सिंधु नररूप हरि ।
महामोह तम पुंज जासु बचन रबि कर निकर

राजीव कुमार कुलश्रेष्ठ
satguru-satykikhoj.blogspot.com
बंदउ गुरु पद पदुम परागा । सुरुचि सुबास सरस अनुरागा ॥
अमिय मूरिमय चूरन चारू । समन सकल भव रुज परिवारू
सुकृति संभु तन बिमल बिभूती । मंजुल मंगल मोद प्रसूती ॥
जन मन मंजु मुकुर मल हरनी । किए तिलक गुन गन बस करनी
श्रीगुर पद नख मनि गन जोती । सुमिरत दिब्य दृष्टि हिय होती ॥
दलन मोह तम सो सप्रकासू । बड़े भाग उर आवइ जासू
उघरहिं बिमल बिलोचन हिय के । मिटहिं दोष दुख भव रजनी के ॥
सूझहिं राम चरित मनि मानिक । गुपुत प्रगट जहँ जो जेहि खानिक

जथा सुअंजन अंजि दृग साधक सिद्ध सुजान ।
कौतुक देखत सैल बन भूतल भूरि निधान

राजीव कुमार कुलश्रेष्ठ
satguru-satykikhoj.blogspot.com
गुरु पद रज मृदु मंजुल अंजन । नयन अमिय दृग दोष बिभंजन ॥
तेहिं करि बिमल बिबेक बिलोचन । बरनउ राम चरित भव मोचन
बंदउ प्रथम महीसुर चरना । मोह जनित संसय सब हरना ॥
सुजन समाज सकल गुन खानी । करउ प्रनाम सप्रेम सुबानी ॥
साधु चरित सुभ चरित कपासू । निरस बिसद गुनमय फल जासू॥
जो सहि दुख परछिद्र दुरावा । बंदनीय जेहि जग जस पावा
मुद मंगलमय संत समाजू । जो जग जंगम तीरथराजू ॥
राम भक्ति जहँ सुरसरि धारा । सरसइ ब्रह्म बिचार प्रचारा ॥
बिधि निषेधमय कलि मल हरनी । करम कथा रबिनंदनि बरनी ॥
हरि हर कथा बिराजति बेनी । सुनत सकल मुद मंगल देनी ॥
बटु बिस्वास अचल निज धरमा । तीरथराज समाज सुकरमा ॥
सबहिं सुलभ सब दिन सब देसा । सेवत सादर समन कलेसा ॥
अकथ अलौकिक तीरथराऊ । देइ सद्य फल प्रगट प्रभाऊ ॥

सुनि समुझहिं जन मुदित मन मज्जहिं अति अनुराग ।
लहहिं चारि फल अछत तनु साधु समाज प्रयाग ॥

राजीव कुमार कुलश्रेष्ठ
satguru-satykikhoj.blogspot.com
मज्जन फल पेखिअ ततकाला । काक होहिं पिक बकउ मराला ॥
सुनि आचरज करै जनि कोई । सतसंगति महिमा नहिं गोई ॥
बालमीक नारद घटजोनी । निज निज मुखनि कही निज होनी ॥
जलचर थलचर नभचर नाना । जे जड़ चेतन जीव जहाना ॥
मति कीरति गति भूति भलाई । जब जेहिं जतन जहाँ जेहिं पाई ॥
सो जानब सतसंग प्रभाऊ । लोकहु बेद न आन उपाऊ ॥
बिनु सतसंग बिबेक न होई । राम कृपा बिनु सुलभ न सोई ॥
सतसंगत मुद मंगल मूला । सोइ फल सिधि सब साधन फूला ॥
सठ सुधरहिं सतसंगति पाई । पारस परस कुधात सुहाई ॥
बिधि बस सुजन कुसंगत परहीं । फनि मनि सम निज गुन अनुसरहीं ॥
बिधि हरि हर कबि कोबिद बानी । कहत साधु महिमा सकुचानी ॥
सो मो सन कहि जात न कैसें । साक बनिक मनि गुन गन जैसें ॥

बंदउ संत समान चित हित अनहित नहिं कोइ ।
अंजलि गत सुभ सुमन जिमि सम सुगंध कर दोइ ॥
संत सरल चित जगत हित जानि सुभाउ सनेहु ।
बालबिनय सुनि करि कृपा राम चरन रति देहु ॥

राजीव कुमार कुलश्रेष्ठ
satguru-satykikhoj.blogspot.com
बहुरि बंदि खल गन सतिभाएं । जे बिनु काज दाहिनेहु बांए ॥
पर हित हानि लाभ जिन्ह केरे । उजरें हरष बिषाद बसेरे ॥
हरि हर जस राकेस राहु से । पर अकाज भट सहसबाहु से ॥
जे पर दोष लखहिं सहसाखी । पर हित घृत जिन्ह के मन माखी ॥
तेज कृसानु रोष महिषेसा । अघ अवगुन धन धनी धनेसा ॥
उदय केत सम हित सबही के । कुंभकरन सम सोवत नीके ॥
पर अकाजु लगि तनु परिहरहीं । जिमि हिम उपल कृषी दलि गरहीं ॥
बंदउ खल जस सेष सरोषा । सहस बदन बरनइ पर दोषा ॥
पुनि प्रनवउ पृथुराज समाना । पर अघ सुनइ सहस दस काना ॥
बहुरि सक्र सम बिनवउ तेही । संतत सुरानीक हित जेही ॥
बचन बज्र जेहि सदा पिआरा । सहस नयन पर दोष निहारा ॥

उदासीन अरि मीत हित सुनत जरहिं खल रीति ।
जानि पानि जुग जोरि जन बिनती करइ सप्रीति ॥

राजीव कुमार कुलश्रेष्ठ
satguru-satykikhoj.blogspot.com
मैं अपनी दिसि कीन्ह निहोरा । तिन्ह निज ओर न लाउब भोरा ॥
बायस पलिअहिं अति अनुरागा । होहिं निरामिष कबहु कि कागा ॥
बंदउ संत असज्जन चरना । दुखप्रद उभय बीच कछु बरना ॥
बिछुरत एक प्रान हरि लेही । मिलत एक दुख दारुन देही ॥
उपजहिं एक संग जग माहीं । जलज जोंक जिमि गुन बिलगाहीं ॥
सुधा सुरा सम साधू असाधू । जनक एक जग जलधि अगाधू ॥
भल अनभल निज निज करतूती । लहत सुजस अपलोक बिभूती ॥
सुधा सुधाकर सुरसरि साधू । गरल अनल कलिमल सरि ब्याधू ॥
गुन अवगुन जानत सब कोई । जो जेहि भाव नीक तेहि सोई ॥

भलो भलाइहि पे लहइ लहइ निचाइहि नीचु ।
सुधा सराहिअ अमरता गरल सराहिअ मीचु

राजीव कुमार कुलश्रेष्ठ
satguru-satykikhoj.blogspot.com
खल अघ अगुन साधू गुन गाहा । उभय अपार उदधि अवगाहा ॥
तेहि तें कछु गुन दोष बखाने । संग्रह त्याग न बिनु पहिचाने ॥
भलेउ पोच सब बिधि उपजाए । गनि गुन दोष बेद बिलगाए ॥
कहहिं बेद इतिहास पुराना । बिधि प्रपंचु गुन अवगुन साना ॥
दुख सुख पाप पुन्य दिन राती । साधु असाधु सुजाति कुजाती ॥
दानव देव ऊँच अरु नीचू । अमिअ सुजीवनु माहुरु मीचू ॥
माया ब्रह्म जीव जगदीसा । लच्छि अलच्छि रंक अवनीसा ॥
कासी मग सुरसरि क्रमनासा । मरु मारव महिदेव गवासा
सरग नरक अनुराग बिरागा । निगमागम गुन दोष बिभागा

जड़ चेतन गुन दोषमय बिस्व कीन्ह करतार ।
संत हंस गुन गहहिं पय परिहरि बारि बिकार

राजीव कुमार कुलश्रेष्ठ
satguru-satykikhoj.blogspot.com
अस बिबेक जब देइ बिधाता । तब तजि दोष गुनहिं मनु राता ॥
काल सुभाउ करम बरिआई । भलेउ प्रकृति बस चुकइ भलाई
सो सुधारि हरिजन जिमि लेहीं । दलि दुख दोष बिमल जसु देहीं ॥
खलउ करहिं भल पाइ सुसंगू । मिटइ न मलिन सुभाउ अभंगू
लखि सुबेष जग बंचक जेऊ । बेष प्रताप पूजिअहिं तेऊ ॥
उधरहिं अंत न होइ निबाहू । कालनेमि जिमि रावन राहू
किएहु कुबेष साधु सनमानू । जिमि जग जामवंत हनुमानू ॥
हानि कुसंग सुसंगति लाहू । लोकहु बेद बिदित सब काहू
गगन चढ़इ रज पवन प्रसंगा । कीचहिं मिलइ नीच जल संगा ॥
साधु असाधु सदन सुक सारीं । सुमिरहिं राम देहिं गनि गारी
धूम कुसंगति कारिख होई । लिखिअ पुरान मंजु मसि सोई ॥
सोइ जल अनल अनिल संघाता । होइ जलद जग जीवन दाता ॥

राजीव कुमार कुलश्रेष्ठ
satguru-satykikhoj.blogspot.com
ग्रह भेषज जल पवन पट पाइ कुजोग सुजोग ।
होहि कुबस्तु सुबस्तु जग लखहिं सुलच्छन लोग
सम प्रकास तम पाख दुहु नाम भेद बिधि कीन्ह ।
ससि सोषक पोषक समुझि जग जस अपजस दीन्ह
जड़ चेतन जग जीव जत सकल राममय जानि ।
बंदउ सब के पद कमल सदा जोरि जुग पानि
देव दनुज नर नाग खग प्रेत पितर गंधर्ब ।
बंदउ किंनर रजनिचर कृपा करहु अब सर्ब

राजीव कुमार कुलश्रेष्ठ
satguru-satykikhoj.blogspot.com
आकर चारि लाख चौरासी । जाति जीव जल थल नभ बासी ॥
सीय राममय सब जग जानी । करउ प्रनाम जोरि जुग पानी ॥
जानि कृपाकर किंकर मोहू । सब मिलि करहु छाड़ि छल छोहू ॥
निज बुधि बल भरोस मोहि नाहीं । ताते बिनय करउ सब पाही ॥
करन चहउ रघुपति गुन गाहा । लघु मति मोरि चरित अवगाहा ॥
सूझ न एकउ अंग उपाऊ । मन मति रंक मनोरथ राऊ ॥
मति अति नीच ऊंचि रुचि आछी । चहिअ अमिअ जग जुरइ न छाछी ॥
छमिहहिं सज्जन मोरि ढिठाई । सुनिहहिं बालबचन मन लाई ॥
जो बालक कह तोतरि बाता । सुनहिं मुदित मन पितु अरु माता ॥
हसिहहिं कूर कुटिल कुबिचारी । जे पर दूषन भूषनधारी ॥
निज कबित्त केहि लाग न नीका । सरस होउ अथवा अति फीका॥
जे पर भनिति सुनत हरषाहीं । ते बर पुरुष बहुत जग नाहीं॥
जग बहु नर सर सरि सम भाई । जे निज बाढ़ि बढ़हिं जल पाई॥
सज्जन सकृत सिंधु सम कोई । देखि पूर बिधु बाढ़इ जोई॥

भाग छोट अभिलाषु बड़ करउ एक बिस्वास ।
पैहहिं सुख सुनि सुजन सब खल करिहहिं उपहास ॥

राजीव कुमार कुलश्रेष्ठ
satguru-satykikhoj.blogspot.com
खल परिहास होइ हित मोरा । काक कहहिं कलकंठ कठोरा ॥
हंसहि बक दादुर चातकही । हसहिं मलिन खल बिमल बतकही ॥
कबित रसिक न राम पद नेहू । तिन्ह कह सुखद हास रस एहू ॥
भाषा भनिति भोरि मति मोरी । हसिबे जोग हँसे नहि खोरी ॥
प्रभु पद प्रीति न सामुझि नीकी । तिन्हहि कथा सुनि लागहि फीकी ॥
हरि हर पद रति मति न कुतरकी । तिन्ह कहु मधुर कथा रघुबर की ॥
राम भगति भूषित जिय जानी । सुनिहहिं सुजन सराहि सुबानी ॥
कबि न होउ नहिं बचन प्रबीनू । सकल कला सब बिद्या हीनू ॥
आखर अरथ अलंकृति नाना । छंद प्रबंध अनेक बिधाना ॥
भाव भेद रस भेद अपारा । कबित दोष गुन बिबिध प्रकारा ॥
कबित बिबेक एक नहिं मोरे । सत्य कहउ लिखि कागद कोरे॥

भनिति मोरि सब गुन रहित बिस्व बिदित गुन एक।
सो बिचारि सुनिहहिं सुमति जिन्ह कें बिमल बिवेक॥

राजीव कुमार कुलश्रेष्ठ
satguru-satykikhoj.blogspot.com
एहि मह रघुपति नाम उदारा । अति पावन पुरान श्रुति सारा ॥
मंगल भवन अमंगल हारी । उमा सहित जेहि जपत पुरारी
भनिति बिचित्र सुकबि कृत जोऊ । राम नाम बिनु सोह न सोऊ॥
बिधुबदनी सब भांति संवारी । सोह न बसन बिना बर नारी
सब गुन रहित कुकबि कृत बानी । राम नाम जस अंकित जानी
सादर कहहिं सुनहिं बुध ताही । मधुकर सरिस संत गुनग्राही
जदपि कबित रस एकउ नाहीं । राम प्रताप प्रकट एहि माहीं ॥
सोइ भरोस मोरे मन आवा । केहिं न सुसंग बड़प्पनु पावा
धूमउ तजइ सहज करुआई । अगरु प्रसंग सुगंध बसाई ॥
भनिति भदेस बस्तु भलि बरनी । राम कथा जग मंगल करनी

राजीव कुमार कुलश्रेष्ठ
satguru-satykikhoj.blogspot.com
मंगल करनि कलि मल हरनि तुलसी कथा रघुनाथ की ॥
गति कूर कबिता सरित की ज्यों सरित पावन पाथ की ॥
प्रभु सुजस संगति भनिति भलि होइहि सुजन मन भावनी ॥
भव अंग भूति मसान की सुमिरत सुहावनि पावनी ॥
प्रिय लागिहि अति सबहि मम भनिति राम जस संग ।
दारु बिचारु कि करइ कोउ बंदिअ मलय प्रसंग
स्याम सुरभि पय बिसद अति गुनद करहिं सब पान ।
गिरा ग्राम्य सिय राम जस गावहिं सुनहिं सुजान

राजीव कुमार कुलश्रेष्ठ
satguru-satykikhoj.blogspot.com
मनि मानिक मुकुता छबि जैसी । अहि गिरि गज सिर सोह न तैसी ॥
नृप किरीट तरुनी तनु पाई । लहहिं सकल सोभा अधिकाई ॥
तैसेहि सुकबि कबित बुध कहहीं । उपजहिं अनत अनत छबि लहहीं ॥
भगति हेतु बिधि भवन बिहाई । सुमिरत सारद आवति धाई
राम चरित सर बिनु अन्हवाए । सो श्रम जाइ न कोटि उपाए ॥
कबि कोबिद अस हृदय बिचारी । गावहिं हरि जस कलि मल हारी
कीन्हें प्राकृत जन गुन गाना । सिर धुनि गिरा लगत पछिताना ॥
हृदय सिंधु मति सीप समाना । स्वाति सारदा कहहिं सुजाना
जो बरषइ बर बारि बिचारू । होहिं कबित मुकुतामनि चारू

जुगुति बेधि पुनि पोहिअहिं रामचरित बर ताग ।
पहिरहिं सज्जन बिमल उर सोभा अति अनुराग

राजीव कुमार कुलश्रेष्ठ
satguru-satykikhoj.blogspot.com
जे जनमे कलिकाल कराला । करतब बायस बेष मराला ॥
चलत कुपंथ बेद मग छाड़े । कपट कलेवर कलि मल भांड़े ॥
बंचक भगत कहाइ राम के । किंकर कंचन कोह काम के ॥
तिन्ह मंह प्रथम रेख जग मोरी । धींग धरमध्वज धंधक धोरी ॥
जो अपने अवगुन सब कहऊ । बाढ़इ कथा पार नहिं लहऊ ॥
ताते मैं अति अलप बखाने । थोरे महु जानिहहि सयाने ॥
समुझि बिबिधि बिधि बिनती मोरी । कोउ न कथा सुनि देइहि खोरी ॥
एतेहु पर करिहहि जे असंका । मोहि ते अधिक ते जड़ मति रंका ॥
कबि न होउ नहिं चतुर कहावउ । मति अनुरूप राम गुन गांवउ ॥
कह रघुपति के चरित अपारा । कह मति मोरि निरत संसारा ॥
जेहिं मारुत गिरि मेरु उड़ाहीं । कहहु तूल केहि लेखे माहीं ॥
समुझत अमित राम प्रभुताई । करत कथा मन अति कदराई ॥

सारद सेस महेस बिधि आगम निगम पुरान।
नेति नेति कहि जासु गुन करहिं निरंतर गान॥

राजीव कुमार कुलश्रेष्ठ
satguru-satykikhoj.blogspot.com
सब जानत प्रभु प्रभुता सोई । तदपि कहे बिनु रहा न कोई
तहाँ बेद अस कारन राखा । भजन प्रभाउ भांति बहु भाषा ॥
एक अनीह अरूप अनामा । अज सच्चिदानंद पर धामा ॥
ब्यापक बिस्वरूप भगवाना । तेहिं धरि देह चरित कृत नाना ॥
सो केवल भगतन हित लागी । परम कृपाल प्रनत अनुरागी ॥
जेहि जन पर ममता अति छोहू । जेहि करुना करि कीन्ह न कोहू ॥
गई बहोर गरीब नेवाजू । सरल सबल साहिब रघुराजू ॥
बुध बरनहिं हरि जस अस जानी । करहि पुनीत सुफल निज बानी ॥
तेहिं बल मैं रघुपति गुन गाथा । कहिहंउ नाइ राम पद माथा ॥
मुनिन्ह प्रथम हरि कीरति गाई । तेहि मग चलत सुगम मोहि भाई ॥

अति अपार जे सरित बर जो नृप सेतु कराहिं ।
चढि पिपीलिकउ परम लघु बिनु श्रम पारहि जाहिं ॥

राजीव कुमार कुलश्रेष्ठ
satguru-satykikhoj.blogspot.com
एहि प्रकार बल मनहि देखाई । करिहउ रघुपति कथा सुहाई ॥
ब्यास आदि कबि पुंगव नाना । जिन्ह सादर हरि सुजस बखाना ॥
चरन कमल बंदउ तिन्ह केरे । पुरवंहु सकल मनोरथ मेरे ॥
कलि के कबिन्ह करउ परनामा । जिन्ह बरने रघुपति गुन ग्रामा ॥
जे प्राकृत कबि परम सयाने । भाषा जिन्ह हरि चरित बखाने ॥
भए जे अहहि जे होइहहिं आगे । प्रनवउ सबहि कपट सब त्यागे ॥
होहु प्रसन्न देहु बरदानू। साधु समाज भनिति सनमानू॥
जो प्रबंध बुध नहिं आदरहीं। सो श्रम बादि बाल कबि करहीं॥
कीरति भनिति भूति भलि सोई। सुरसरि सम सब कह हित होई॥
राम सुकीरति भनिति भदेसा। असमंजस अस मोहि अंदेसा॥
तुम्हरी कृपा सुलभ सोउ मोरे। सिअनि सुहावनि टाट पटोरे॥

राजीव कुमार कुलश्रेष्ठ
satguru-satykikhoj.blogspot.com
सरल कबित कीरति बिमल सोइ आदरहिं सुजान ।
सहज बयर बिसराइ रिपु जो सुनि करहिं बखान ॥
सो न होइ बिनु बिमल मति मोहि मति बल अति थोर ।
करहु कृपा हरि जस कहंउ पुनि पुनि करंउ निहोर ॥
कबि कोबिद रघुबर चरित मानस मंजु मराल।
बाल बिनय सुनि सुरुचि लखि मो पर होहु कृपाल॥
बंदउ मुनि पद कंजु रामायन जेहिं निरमयउ।
सखर सुकोमल मंजु दोष रहित दूषन सहित॥
बंदउ चारिउ बेद भव बारिधि बोहित सरिस।
जिन्हहि न सपनेहु खेद बरनत रघुबर बिसद जसु॥
बंदउ बिधि पद रेनु भव सागर जेहि कीन्ह जहं।
संत सुधा ससि धेनु प्रगटे खल बिष बारुनी॥
बिबुध बिप्र बुध ग्रह चरन बंदि कहउ कर जोरि।
होइ प्रसन्न पुरवहु सकल मंजु मनोरथ मोरि॥

राजीव कुमार कुलश्रेष्ठ
satguru-satykikhoj.blogspot.com
पुनि बंदउ सारद सुरसरिता । जुगल पुनीत मनोहर चरिता ॥
मज्जन पान पाप हर एका । कहत सुनत एक हर अबिबेका॥
गुर पितु मातु महेस भवानी । प्रनवउ दीनबंधु दिन दानी॥
सेवक स्वामि सखा सिय पी के । हित निरुपधि सब बिधि तुलसी के॥
कलि बिलोकि जग हित हर गिरिजा । साबर मंत्र जाल जिन्ह सिरिजा॥
अनमिल आखर अरथ न जापू । प्रगट प्रभाउ महेस प्रतापू ॥
सो उमेस मोहि पर अनुकूला । करिहिं कथा मुद मंगल मूला॥
सुमिरि सिवा सिव पाइ पसाऊ । बरनउ रामचरित चित चाऊ॥
भनिति मोरि सिव कृपा बिभाती । ससि समाज मिलि मनहु सुराती॥
जे एहि कथहि सनेह समेता । कहिहहि सुनिहहि समुझि सचेता॥
होइहहिं राम चरन अनुरागी । कलि मल रहित सुमंगल भागी॥

सपनेहु साचेहु मोहि पर जो हर गौरि पसाउ ।
तो फुर होउ जो कहेउ सब भाषा भनिति प्रभाउ ॥

राजीव कुमार कुलश्रेष्ठ
satguru-satykikhoj.blogspot.com
बंदउ अवध पुरी अति पावनि । सरजू सरि कलि कलुष नसावनि ॥
प्रनवउ पुर नर नारि बहोरी । ममता जिन्ह पर प्रभुहि न थोरी ॥
सिय निंदक अघ ओघ नसाए । लोक बिसोक बनाइ बसाए ॥
बंदउ कौसल्या दिसि प्राची । कीरति जासु सकल जग माची ॥
प्रगटेउ जह रघुपति ससि चारू । बिस्व सुखद खल कमल तुसारू ॥
दसरथ राउ सहित सब रानी । सुकृत सुमंगल मूरति मानी ॥
करउं प्रनाम करम मन बानी । करहु कृपा सुत सेवक जानी ॥
जिन्हहि बिरचि बड़ भयउ बिधाता । महिमा अवधि राम पितु माता ॥

बंदउ अवध भुआल सत्य प्रेम जेहि राम पद ।
बिछुरत दीनदयाल प्रिय तनु तृन इव परिहरेउ ॥

राजीव कुमार कुलश्रेष्ठ
satguru-satykikhoj.blogspot.com
प्रनवउ परिजन सहित बिदेहू । जाहि राम पद गूढ़ सनेहू ॥
जोग भोग महं राखेउ गोई । राम बिलोकत प्रगटेउ सोई ॥
प्रनवउ प्रथम भरत के चरना । जासु नेम ब्रत जाइ न बरना ॥
राम चरन पंकज मन जासू । लुबुध मधुप इव तजइ न पासू ॥
बंदउ लछिमन पद जलजाता । सीतल सुभग भगत सुख दाता ॥
रघुपति कीरति बिमल पताका । दंड समान भयउ जस जाका ॥
सेष सहस्त्रसीस जग कारन । जो अवतरेउ भूमि भय टारन ॥
सदा सो सानुकूल रह मो पर । कृपासिंधु सौमित्र गुनाकर ॥
रिपुसूदन पद कमल नमामी । सूर सुसील भरत अनुगामी ॥
महाबीर बिनवउ हनुमाना । राम जासु जस आप बखाना ॥

प्रनवउ पवनकुमार खल बन पावक ग्यानघन ।
जासु हृदय आगार बसहिं राम सर चाप धर ॥

राजीव कुमार कुलश्रेष्ठ
satguru-satykikhoj.blogspot.com
कपिपति रीछ निसाचर राजा । अंगदादि जे कीस समाजा ॥
बंदउ सब के चरन सुहाए । अधम सरीर राम जिन्ह पाए ॥
रघुपति चरन उपासक जेते । खग मृग सुर नर असुर समेते ॥
बंदउ पद सरोज सब केरे । जे बिनु काम राम के चेरे ॥
सुक सनकादि भगत मुनि नारद । जे मुनिबर बिग्यान बिसारद ॥
प्रनवउ सबहिं धरनि धरि सीसा । करहु कृपा जन जानि मुनीसा ॥
जनकसुता जग जननि जानकी । अतिसय प्रिय करुनानिधान की ॥
ताके जुग पद कमल मनावंउ । जासु कृपा निरमल मति पांवउ ॥
पुनि मन बचन कर्म रघुनायक । चरन कमल बंदउ सब लायक ॥
राजिवनयन धरें धनु सायक । भगत बिपति भंजन सुख दायक ॥

गिरा अरथ जल बीचि सम कहिअत भिन्न न भिन्न ।
बंदउ सीता राम पद जिन्हहि परम प्रिय खिन्न ॥

राजीव कुमार कुलश्रेष्ठ
satguru-satykikhoj.blogspot.com
बंदउ नाम राम रघुवर को । हेतु कृसानु भानु हिमकर को ॥
बिधि हरि हरमय बेद प्रान सो । अगुन अनूपम गुन निधान सो ॥
महामंत्र जोइ जपत महेसू । कासी मुकुति हेतु उपदेसू
महिमा जासु जान गनराउ । प्रथम पूजिअत नाम प्रभाऊ
जान आदिकबि नाम प्रतापू । भयउ सुद्ध करि उलटा जापू
सहस नाम सम सुनि सिव बानी । जपि जेई पिय संग भवानी
हरषे हेतु हेरि हर ही को । किय भूषन तिय भूषन ती को ॥
नाम प्रभाउ जान सिव नीको । कालकूट फलु दीन्ह अमी को

बरषा रितु रघुपति भगति तुलसी सालि सुदास ॥
राम नाम बर बरन जुग सावन भादव मास ॥

राजीव कुमार कुलश्रेष्ठ
satguru-satykikhoj.blogspot.com
आखर मधुर मनोहर दोऊ । बरन बिलोचन जन जिय जोऊ ॥
सुमिरत सुलभ सुखद सब काहू । लोक लाहु परलोक निबाहू ॥
कहत सुनत सुमिरत सुठि नीके । राम लखन सम प्रिय तुलसी के ॥
बरनत बरन प्रीति बिलगाती । ब्रह्म जीव सम सहज संघाती॥
नर नारायन सरिस सुभ्राता । जग पालक बिसेषि जन त्राता ॥
भगति सुतिय कल करन बिभूषन । जग हित हेतु बिमल बिधु पूषन ॥
स्वाद तोष सम सुगति सुधा के । कमठ सेष सम धर बसुधा के ॥
जन मन मंजु कंज मधुकर से । जीह जसोमति हरि हलधर से ॥

एकु छत्रु एकु मुकुटमनि सब बरननि पर जोउ ।
तुलसी रघुबर नाम के बरन बिराजत दोउ ॥

राजीव कुमार कुलश्रेष्ठ
satguru-satykikhoj.blogspot.com
समुझत सरिस नाम अरु नामी । प्रीति परसपर प्रभु अनुगामी ॥
नाम रूप दुइ ईस उपाधी । अकथ अनादि सुसामुझि साधी
को बड़ छोट कहत अपराधू । सुनि गुन भेद समुझिहहिं साधू
देखिअहिं रूप नाम आधीना । रूप ग्यान नहिं नाम बिहीना
रूप बिसेष नाम बिनु जानें । करतल गत न परहिं पहिचानें ॥
सुमिरिअ नाम रूप बिनु देखे । आवत हृदय सनेह बिसेषे
नाम रूप गति अकथ कहानीन । समुझत सुखद न परति बखानी ॥
अगुन सगुन बिच नाम सुसाखी । उभय प्रबोधक चतुर दुभाषी

राम नाम मनिदीप धरु जीह देहरी द्वार ।
तुलसी भीतर बाहरहु जो चाहसि उजिआर ॥

राजीव कुमार कुलश्रेष्ठ
satguru-satykikhoj.blogspot.com
नाम जीह जपि जागहिं जोगी । बिरति बिरंचि प्रपंच बियोगी ॥
ब्रह्मसुखहि अनुभवहि अनूपा । अकथ अनामय नाम न रूपा ॥
जाना चहहि गूढ़ गति जेऊ । नाम जीह जपि जानहि तेऊ
साधक नाम जपहि लय लाए । होहि सिद्ध अनिमादिक पाए
जपहिं नामु जन आरत भारी । मिटहिं कुसंकट होहिं सुखारी
राम भगत जग चारि प्रकारा । सुकृती चारिउ अनघ उदारा ॥
चहू चतुर कहु नाम अधारा । ग्यानी प्रभुहि बिसेषि पिआरा
चहु जुग चहु श्रुति नाम प्रभाऊ । कलि बिसेषि नहिं आन उपाऊ

सकल कामना हीन जे राम भगति रस लीन ।
नाम सुप्रेम पियूष हद तिन्हहु किए मन मीन

राजीव कुमार कुलश्रेष्ठ
satguru-satykikhoj.blogspot.com
अगुन सगुन दुइ ब्रह्म सरूपा। अकथ अगाध अनादि अनूपा॥
मोरें मत बड़ नामु दुहू तें। किए जेहिं जुग निज बस निज बूतें॥
प्रौढ़ि सुजन जनि जानहिं जन की। कहउ प्रतीति प्रीति रुचि मन की॥
एकु दारुगत देखिअ एकू। पावक सम जुग ब्रह्म बिबेकू॥
उभय अगम जुग सुगम नाम ते। कहेउ नामु बड़ ब्रह्म राम ते॥
ब्यापकु एकु ब्रह्म अबिनासी। सत चेतन घन आंनद रासी
अस प्रभु हृदय अछत अबिकारी। सकल जीव जग दीन दुखारी॥
नाम निरूपन नाम जतन ते। सोउ प्रगटत जिमि मोल रतन ते॥

निरगुन ते एहि भांति बड़ नाम प्रभाउ अपार।
कहंउ नामु बड़ राम ते निज बिचार अनुसार

राजीव कुमार कुलश्रेष्ठ
satguru-satykikhoj.blogspot.com
राम भगत हित नर तनु धारी। सहि संकट किए साधु सुखारी॥
नामु सप्रेम जपत अनयासा। भगत होहिं मुद मंगल बासा॥
राम एक तापस तिय तारी। नाम कोटि खल कुमति सुधारी॥
रिषि हित राम सुकेतुसुता की। सहित सेन सुत कीन्ह बिबाकी॥
सहित दोष दुख दास दुरासा। दलइ नामु जिमि रबि निसि नासा॥
भंजेउ राम आपु भव चापू। भव भय भंजन नाम प्रतापू॥
दंडक बनु प्रभु कीन्ह सुहावन। जन मन अमित नाम किए पावन॥।
निसिचर निकर दले रघुनंदन। नामु सकल कलि कलुष निकंदन॥

सबरी गीध सुसेवकनि सुगति दीन्हि रघुनाथ।
नाम उधारे अमित खल बेद बिदित गुन गाथ॥

राजीव कुमार कुलश्रेष्ठ
satguru-satykikhoj.blogspot.com
राम सुकंठ बिभीषन दोऊ। राखे सरन जान सबु कोऊ॥
नाम गरीब अनेक नेवाजे। लोक बेद बर बिरिद बिराजे॥
राम भालु कपि कटकु बटोरा। सेतु हेतु श्रमु कीन्ह न थोरा॥
नामु लेत भवसिंधु सुखाहीं। करहु बिचारु सुजन मन माहीं
राम सकुल रन रावनु मारा। सीय सहित निज पुर पगु धारा॥
राजा रामु अवध रजधानी। गावत गुन सुर मुनि बर बानी॥
सेवक सुमिरत नामु सप्रीती। बिनु श्रम प्रबल मोह दलु जीती॥
फिरत सनेह मगन सुख अपने। नाम प्रसाद सोच नहिं सपने॥

ब्रह्म राम ते नामु बड़ बर दायक बर दानि।
रामचरित सत कोटि मह लिय महेस जिय जानि

मासपारायण, पहला विश्राम
राजीव कुमार कुलश्रेष्ठ
satguru-satykikhoj.blogspot.com

कोई टिप्पणी नहीं:

Related Posts Plugin for WordPress, Blogger...